Հոկտեմբերի 13-ին և 14-ին յուրօրինակ ցուցահանդեսի միջոցով ներկայացվեցին Հազարամյակի մարտահրավեր հիմնադրամ-Հայաստանի (ՀՄՀ-Հայաստան) Ջրից դեպի Շուկա բաղադրիչի երեքամյա գործունեության արդյունքները: Ցուցահանդեսում ներկայացված էին ոռոգման, գյուղատնտեսական արտադրանքի և հետբերքահավաքային գործընթացների առաջավոր փորձն ու ժամանակակից տեխնոլոգիաները: Ցուցահանդեսի միջոցով նաև անդրադարձ էր կատարվում շուկայի հնարավորությունները բացահայտելու և դրանք ֆերմերներին ներկայացնելու ուղղությամբ ունեցած հաջողություններին: 

Համայնքային կապեր ծրագրի աշխատակազմը, որ 2007թ. ծրագրի շրջանակներում իրականացրեց Ջրից դեպի Շուկա ծրագրի նպատակներին համահունչ մշակված "Ջրօգտագործողների ընկերություններ (ՋՕԸ)" ծրագիրը , նույնպես հրավիրված էր ցուցահանդես: Վերը նշված ծրագրի շրջանակներում տաս հայ ջրօգտագործողներ այցելեցին Կալիֆորնիա, ԱՄՆ` ուսումնասիրելու այնտեղի ջրօգտագործման համակարգի արդյունավետ տեխնիկան ու փորձը: Ծրագրի նպատակն էր` Ընդլայնել Ջրօգտագործողների ընկերությունների տնտեսվարման եւ կառավարման կարողությունները` հնարավորություն ընձեռելով նրանց կազմակերպչական առումով առավել կայուն եւ ֆինանսապես առավել արդյունավետ վարել տնտեսությունը: Վարդենիսի ՋՕԸ  նախագահ և Համայնքային կապեր ծրագրի շրջանավարտ Հոմերոս Սաֆարյանը համակարգում էր ոռոգման նորագույն տեխնոլոգիաների ցուցադրությունը: Համայնքային կապեր ծրագրի աշխատակազմը այցելեց բազմաթիվ տաղավարներ ու հանդիպեց բազում ֆերմերների, ովքեր փորձում են ապահովել արդյունավետ համագործակցություն գյուղատնտեսական բարելավված արտադրության և ագրոբիզնեսի ձեռնարկությունների միջև: Այս միջոցառումը առիթ հանդիսացավ, որպեսզի Համայնքային կապեր ծրագրի աշխատակազմը վերականգնի կապերը ծրագրի շրջանավարտների հետ, գործնականում գնահատելով նրանց գործողությունների պլանների առաջընթացն ու իրականացրած այլ գործունեություն: