აშშ-ში ჩამოსვლისას აეროპორტში პირველ რიგში მოგიწევთ ამერიკის საემიგრაციო სამსახურთან შეხვედრა, ბარგის აღება და საბაჟოს გავლა. იმისათვის რომ ეს პროცესი სწრაფად და იოლად გაიაროთ, საჭიროა რიგი დოკუმენტები წინასწარ მომზადებული გქონდეთ და წარუდგინოთ საემიგრაციო და საბაჟო განყოფილებებს: საერთაშორისო პასპორტი თანდართული DS 2019 ფორმითა და ვიზით, შევსებული I – 94 ფორმა და საბაჟო დეკლარაცია.  

აშშ-ს საემიგრაციო სამსახური

აშშ-ში ჩამოსვლისას ავიახაზების წარმომადგენლები საემიგრაციო დარბაზისკენ გზას მიგითითებენ. დარბაზში რიგში ჩადგებით და დაელოდებით სანამ საემიგრაციო სამსახურის ოფიცერი არ გამოგიძახებთ. საემიგრაციო ოფიცერი გაარკვევს რა მიზნით ჩამოდიხართ შტატებში, რა საბუთები გაგაჩნიათ ამის დამადასტურებელი და რა დროს დაჰყობთ შტატებში. მთელი ეს პროცესი ერთ წუთზე მეტს არ წაიღებს. თუ ყველაფერი წესრიგშია იგი ჩაარტყამს თქვენს პასპორტში ბეჭედს და მოგცემთ უკვე შევსებულ I-94 ფორმას. ამ ფორმაში ნაჩვენები იქნება თქვენი სტატუსი შტატებში და დროის ხანგრძლივობა, რომელსაც ქვეყანაში დაჰყობთ. ამ ფორმის ერთ ნაწილს სეამიგრაციო სამსახურის ოფიცერი თქვენს პასპორტში ჩააკრავს. ეს ნაწილი ჩაკრული უნდა დარჩეს პასპორტში თქვენი შტატებიდან გამომგზავრებამდე. 

I - 94 ფორმა

ავიახაზების თანამშრომლები მოგცემენ სპეციალურ ფორმას – I-94 (თეთრი) ჩამოსვლა/გამგზავრების ბლანკი, რომელსაც ავსებს ყველა არა აშშ-ს მოქალაქე ჯერ კიდევ თვითმფრინავში შტატებში დაშვებისას. ამ ფორმაში მისათითებელია ძირითადი საიდენტიფიკაციო ინფორმაცია და ის მისამართი, სადაც თქვენ აპირებთ ცხოვრებას აშშ-ში – ანუ მიუთითეთ მასპინძელი ორგანიზაციის მისამართი. 

I-94 ფორმის შევსებისას გახსოვდეთ:

ყველაფერი შეავსეთ ინგლისურად; მისამართის გრაფაში მიუთითეთ მასპინძელი ორგანიზაციის მისამართი;თქვენი დაბადების თარიღი ჩაწერეთ შემდეგნაირად: თვე/დღე/წელი; ჩაწერეთ ყველაფერი დიდი ასოებით; ფორმა შეავსეთ შავი ან ლურჯი კალმისარით; ფორმის ქვედა ნაწილი რჩება თქვენს პასპორტში შტატებიდან გამომგზავრებამდე.

DS 2019 ფორმა

საემიგრაციო სამსახურის ოფიცერს თქვენ უნდა წარუდგინოთ DS 2019 ფორმა, რომელიც თან ახლავს (ჩაკრულია) თქვენს საერთაშორისო პასპორტში. ეს ფორმა ადასტურებს იმას, რომ თქვენ ხართ აშშ-ს მთავრობის ოფიციალური სტუმარი და ხარჯებს ანაზღაურებს USAID. საემოგრაციო სამსახურის ოფიცერი ამ ფორმას გამოგართმევთ და დაგიბრუნებთ ვარდისფერ ფორმას. ეს ფორმა უნდა შეინახოთ აშშ-დან გამომგზავრებამდე. ამის შემდეგ აიღებთ ბარგს და საბაჟო გამყოფილებაში გადაინაცვლებთ.   

აშშ-ს საბაჟო განყოფილება

ჯერ კიდევ თვითმფრინავში თქვენ მოგეცემათ საბაჟო დეკლარაციის ფორმა, რომელიც უნდა შეავსოთ. საემიგრაციო სამსახურის, პასპორტის კონტროლის განყოფილებების გავლისა და ბარგის აღების შემდეგ, გაივლით აშშ-ს საბაჟოს. საბაჟოზე თქვენ წარუდგენთ თქვენს პასპორტსა და საბაჟო დეკლარაციას. 

საბაჟო განყოფილების გავლისას გახსოვდეთ:

21 წელს ზემოთ მოქალაქეს აქვს უფლება ქვეყანაში შემოიტანოს ერთი ლიტრი ალკოჰოლური სასმელი: ღვინო, არაყი ან ლუდი; თითოეულ მგზავრს შეუძლია ქვეყანაში შემოიტანოს საჩუქრები, რომელთა ღირებულება არ აღემატება 100 აშშ დოლლარს; საჩუქრების სიაში არ შედის ალკოჰოლური სასმელები და სიგარეტი;  ნარკოტიკების, ხორცის, ხილის, ბოსტნეულის და მცენარეების შემოტანა ქვეყანაში სპეციალური ნებართვის გარეშე აკრძალულია. წინააღმდეგ შემთხვევაში დაჯარიმდებით.